იკორთა

ტიხრული მინანქრის სახელოსნო წეროვანში

სოციალური საწარმოს შექმნის ისტორია

სოციალური საწარმო “იკორთა” ტიხრული მინანქრის სახელოსნოა, რომელმაც საქმიანობა 2011 წელს დაიწყო წეროვანის დევნილთა დასახლებაში არსებული გამოწვევების საპასუხოდ. ადგილობრივი ქალების მიერ ჩადებული მცირე ინვესტიციით შექმნილი სოციალური საწარმო, დღეს უკვე წარმატებული მინანქრის სახელოსნოს წარმოადგენს, რომელიც დევნილთა დასახლებაში ქმნის სამოქალაქო და ეკონომიკური განვითარების შესაძლებლობებს.

სოციალური საწარმოს მისია და მიზნები

“იკორთას” მისიაა წეროვანის დევნილთა დასახლებაში მცხოვრები პირების ეკონომიკური მდგომარეობის გაუმჯობესება და ინტეგრაციის პროცესის ხელშეწყობა. ამისთვის საწარმო ზრუნავს სამიზნე ჯგუფის წარმომადგენლების დასაქმებაზე და ორგანიზებას უწევს პროფესიული გადამზადების კურსებს.

სოციალური საწარმოს პროდუქცია/სერვისი

“იკორთას” ტიხრული მინანქრის სახელოსნოში ძველი ქართული ტექნოლოგიის გამოყენებით მზადდება სხვადასხვა სახეობის სამკაული და აქსესუარი.

კერძოდ:

ბეჭედი
საყურე
გულსაკიდი
პერანგის სამაგრი
ბროში
სამაჯური

პროდუქციის შექმნისას გამოიყენება, როგორც ტრადიციული ორნამენტები, ასევე თანამედროვე ტენდენციები.

გარდა პროდუქციისა, 2014 წლიდან, სახელოსნო დაინტერესებულ პირებს სთავაზობს მინანქრის მასტერკლასს „შექმენი შენი საკუთარი“.

კორპორატიული მომხმარებლებისთვის, წინასწარი დაკვეთით შესაძლებელია, სხვადასხვა ნივთზე მინანქრის დეტალის დატანა, რაც ნივთს განსაკუთრებულ იერსახეს ანიჭებს.

დღეისთვის, “იკორთაში” დამზადებული სამკაულებისა და აქსესუარების შეძენა შესაძლებელია თბილისის, მცხეთისა და ვარძიის ტერიტორიაზე მდებარე მაღაზიებში.

სოციალური შედეგები

საწარმოში დასაქმებულია 10 იძულებით გადაადგილებული პირი, რომელთათვისაც დასაქმების ალტერნატიული ადგილები მიუწვდომელია;
დასაქმებულთა შრომის ანაზღაურება მზარდია და შეესაბამება ადგილობრივი ბაზრის ტენდენციებს;
საწარმოდან მიღებული მოგებით, დამფუძნებელი ორგანიზაცია „უკეთესი მომავლისთვის“ ახორციელებს პროფესიული გადამზადების კურსებსა და სხვადასხვა აქტივობას.